الحياة بييس

والله الثورة دي حساها بتتنسا عاملين بيقولوا الدنيا واقفة الدنيا واقفة .. بالعكس انا شايفة ان كل الناس عايشة حياتها عااااااااادي بالعكس 


دي يمكن ماشية احسن من الاول .. كل الناس بتروح الشغل وتقف في طوابير العيش .. والتنسيق زي ما هو و الدنيا زحمة والشوارع 


مش  نضيفة والعربيات بتمشي عكس الاتجاه 

والناس بتصيفق في اسكندريه ومالين الدنيا في القهاوي والسينمات ده غير النهاردة في الفطار في سان كانت مصر كلها هناك

طب ما في فلوس والسياح بنشوفهم في الشوارع

ومادام الدنيا ماشية

اومال انهي عجلة اللي واقفة دي؟؟؟

اكيد مفيش غير عجله الثورة هي الوحيدة اللي واقفة

مفيش حاجة منها بتتنفذ الا لما بالزق

هو في ايه؟ 2

نشرت في 13/05/2011

كلاكيت اكشن تاني مرة .. بس انا بقا اللي احتمال اكون لوحدي اللي هتحول لعلامة استفاهم وتعجب بسبب الموضوع المستفز ده

واللي بيخليني دايما اسأل نفسي

هو في ايه؟؟؟!!!

كل السياسين في مصر - وعشان الحبايب نقول معظمهم - مش بيفكروا كويس وبالذات اللي مرشحين نفسهم لرئاسة الجمهورية دلوقتي

على الفيس بوك انتشر هترشح مين ومش هترشح مين .. وانا كنت بختار وكده بس لاقيت ان الموضوع ده زاد عن حده وانتشر وتوغل

اقولكوا هما مش بيفكروا كويس ليه بقا الناس دي - مع كامل احترااامي ليهم - عشان كل الناس برضو تركيزها على المناصب العليا

كله مهتم اوووووووي بانه ياخد منصب رئيس الجمهورية

يا حبابيبي يا بابا يا ابن الحلال هو احنا مش اتخلصنا من دكتاتور عشان ندخل عصر الديموقراطيه و كده وان الحاكم ميكونش له سلطات واسعه

احنا عايزين الاول مجلس شعب قوي ونثق فيه عشان هو اللي هيبقا نقطة الوصل بينا وبين الرئيس والحكومة

يعني لازم يكون اهتمامنا السياسي حاليا متركز على مين الناس الصالحه ترشح نفسها في مجلس الشعب

يعني لازم دور الاحزاب يظهر لازم نشوف تنافس شريف على الساحه في الاحزاب ومع الناس اللي عايزة تدخل مجلس الشعب

ولازم يكونوا ناس من الشعب وخايفين على الشعب ويقدروا يتحملوا المسئولية دي

لان خلاص مفيش مجلس سيد قراره زي زمان الموضوع ده انتهى

الشعب هو صاحب القرار

وعشان كده انا بحترم الاخوان المسلمين في النقطة دي - مش بقول اني معاهم ولا ليا نفس افكارهم - لا بحترم طريقتهم

منظمين لاقصى درجة ماشيين في طريق عارفين ازاي يقدروا يوصلوا لهدفهم وعددهم كمان كبير وليهم شعبيه عاليه وسط الناس

يا جماعه مش عايزين نرجع زي مان نكون متوقعين مين اللي هيكسب عشان معاه ناس كتير او له نفوذ

لا عايزين نوصل اننا نبقا متحيرين .. اه بجد متحيرين

من كمية الناس الموهوبة والمحتمرة و الجيدة في المجال السياسي اللي تقدر تتقدم بينا

ولما نخلص كل ده ونرتاح من هم مجلس الشعب ويكون عندنا برلمان حقيقي وبجد

نبقا نفكر بقا في مين يصلح يكون رئيس جمهورية

وبتمنى نعمل زي امريكا ويحصل مناظره محترمة ومناقشة

ياريت ده يحصل

وان شاء الله يحصل .. لاننا نستاهل نعيش كده

واحسن كمان من كده

هو في ايه؟

نشرت في 09/05/2011

زمان فيما بين الحربين العالميتين .. كان الاستعمار بيستخدم سياسة معينة لوضع معوقات القومية العربيه .. وكانوا طرق كتير بس انا هذكر شوية منهم لفتوا نظري اوي:/

1- اثار النعرات المحليه في البلاد العربيه .. "فرعونيه في مصر " - آشورية بابلية في العراق" - " فينيقيه آراميه في سوريا

2- اثار الفتن الطائفيه (مسلمين ومسيحين في مصر ) .. ( سنة وشيعه في العراق) .. (الزيدية والسنية في اليمن) .. (الدروز والموارنه في لبنان)

طبعا انتوا حاسين وفي منكم فهم وفي منكم بيقول نعم طب انتي عايزة ايه دلوقتي

عايزة اقولكوا ان اللي بيحصل في مصر مش بس في مصلحة " الفلول" لا ده في مصلحة ناس كتير

بس اصل السؤال دايما اللي كل الشعب بيسألوا حاليا من اللي بيحصل في مصر

هو في ايه؟؟؟

احنا مكناش كده ايام الثورة طبعا الجملة دي سمعتوها مليون مرة وهنفضل نقولها تاني وتالت ورابع

اللي بيحصل ده في مصلحة " الفلول - وحبايبنا الوحشين اللي برا " .. يا جماعه سواء مسلم او مسيحي

هتفرق معاك في ايه "واحدة " اسلمت ولا بقت مسيحية

يعني دي اللي هتزود او تنقص من دينك؟؟؟

الدين لله والوطن للجميع يا عم الحاج

و مش بالملة ولا بالدين اللي هتخلينا نحارب بعض ويحصل كده

انا بشتري حاجات من سوبر ماركت صاحبه مسيحي وعاملني عادي ولانه عارف عيلتي وقالي اسلمله عليهم نفر نفر

يا اخواننا احنا جيران واصحاب وعيله

كام واحد فينا مسلم صاحبه وانتيمة مسيحي!!!

مين فينا في العيد الاضحى او الفطر مش بيهنيه مسيحي صاحبه او جاره او زميله في الشغل

جماعه احنا عايشين مع بعض من زمااااان اووووي ليه هنعمل في بعض كده

ليه هنسمح لشوية ناس تدمر حاجة حلوة احنا عملناها

اما بالنسبة للاخوة السلفيين والله لو حضرتك شايف ان تدمير كنيسة هو الحل لانك عايز تطبق الاحكام والشرائع

احب اقولك ايام الخلفاء عملوا معاهدات مع المسيحين واليهود وكانت بتنص على انهم يحتفظوا بكنائسهم ولا يسمح لهم ببناء كنائس اخرى بس يمكنهم ترميم كنائسهم ومعابدهم فقط .. بس استمر المسيحين و اليهود في بناء الكنائس و المعابد و تسامح معهم الحكام المسلمين

مادام عايز تعبد ربك اعبده مادام مش هتأذي غيرك

القرآن بيقول "لكم دينكم ولي ديني"

وحسب منهج التاريخ اللي انا بذاكره واللي انا جايبه منه الكلام ده

ان الجزيه اللي انتوا عايزين ترجعوها تاني اتشالت عشان المسيحين انضموا للجيش وفي اي حرب هيدافعوا معانا

عشان يحموا بلدهم اللي هي بلدك وبلدي وبلدنا كلنا

واللي من حق اي حد يعيش فيه

....

بس عامة اللي بجد مخليني من قمة استغرابي هتحول لعلامه تعجب وانا قاعدة

موقف الجيييييش والشرطة

حلويييييييييييين .. رايقييييييييييييييين ما علينا يعني دول عايزين حاجة لوحدهم

وبعدين لازم يتحط قانون يمنع التطرف الديني اللي بيحصل من بعض الناس في  الجانبين

عامة محاولات الفتنة الطائفيه اللي احنا بنحس بيها دي انا واثقة انها مش هتدمر البلد دي

لان احنا علاقتنا ببعض اكبر بكتيييييييييير من اي شئ

واحنا الحمدلله بالنسبة لخطط الاستعمار اللي فوق دي رقم (1) تخلصنا منها بقينا كلنا ايد واحدة بالنسبة للعرب بعد ما كان الناس حاسين ان مفيش وحدة بين الدول العربيه

عشان جامعه الدول العربيه مش بتعمل حاجة .. لانها ببساطة في وادي واحنا في وادي

و ليه جامعة الدول العربية في وادي واحنا في وادي .. لسبب واحد من وجهة نظري ان دي جامعه حكومات الدول العربية و ان وحده العرب الحقيقية في وحده شعوب العرب مش في وحدة حكوماتهم

وخاصه لو كانت الحكومات دي عايزة الحرق بجاز .. ووحدة الشعوب اقوى بكتييييييييير من وحدة حكومة لان الشعب اقوى من الحكومة وليس العكس
وانا عن نفسي شايفه ان الطريق للوحدة وان الدول العربيه تقلب موازين القوى في العالم ونبقا احنا الاقوى


وانا بطلب طلب من الناس كل واحد يسمع حكايه او يشوف صورة او فيديو اتأكد منه الاول لانك متعرفش دي حقيقة ولا فبركة واشاعات

ارجووك حكم عقلك ولسانك قبل ما تقول كلمة .. لان الشعب المصري من طبعه حاجتين بيموووت في النميمة وفضووولي جدااا

اتأكدوا يا جماعه من كلامك  لو سمحتوا

وحاجة تانيه اخيرة ياريت بلاش نستغرب من اللي بيحصل ده الطبيعي لان عشان توصل لقمة الجبل هتوقع كتيييير وتتكعبل في زلط وصخور وهتتبهدل

بس لازم نستحمل .. عشان نعييش

الانتماء في الحب

نشرت في 01/03/2011

طبعا كلنا او معظمنا عارف سلسلة الافلام الشهيره الرومانسية

The Twilight Saga

انا من محبي الفيلم ده .. واكتر حاجة عجبتني فيه ان البطلة " بيلا " كانت وجهة نظرها عن الحب انه انتماء

وانا اراهن ان محدش فاهم معنى الانتماء في الحب يعني ايه

طب خلونا نبدأ من الاول

ليه الولد بيحب البنت الايام دي؟؟ .. او ليه الناس بتحب دلوقتي؟
 

يا اما عشان حلوة - او عشان اغراض دنيئة ففي دماغه - او عشان اعجب بيها وحبها

 واللي حبوا بجد دول نوعين:/

النوع الاول :/
 نوع اهو حب عشان يحب وخلاص وفي الاخر يتصدم بارض الواقع ويجي يقولها انا لسه مش لاقي الصفر اللي هبدأ منه حياتي ومش عايز اوقف حياتك .. أو يتعب في نص الطريق من الحب ويتخنق منها

 اما النوع التاني:/
 دول القلة القليلة اللي بتحب بجد ..  وياما القدر يفرق ما بينهم ..  او بيجوزوا بعض
 واللي اجوزوا دول
 نوع بيكمل في الجواز .. ونوع بيطلق عشان اتفاجئ بمسئولية زيادة عليه بسرعه

 واتحداك لو قولتلي ان ده مش الحب الايام دي

 بس مفيش انتماء!!

هتلاقي يعني ناس نااادرة ندرة المية في الصحرا بتحس بالانتماء ده
 الحب عندهم يديهم احساس بانه حياة جديدة صعب يرفضها
 زي اختيار قرار الادمان بس ده بيكون ادمان من نوع كويس
 هو الحب اللي بيدخل فيه العقل كمان
 هو ده حب العقل والقلب
ومش اقصد انه استغلال فرصة
بمعنى ان البنت بتشوف عيش جاهز تريح دماغها وتقول انا حكمت قلبي وعقلي واختارت
الانتماء انه يكون المستقبل عايزه مع حبيبك ده مش اقصد فرصة او استغلال انه غني لالا ممكن يكون انسان بيبتدي حياته
بس البنت تحس انها عايزة تكافح وتبني ذاتها
 بتحس انها بتنتمي للعالم المكافح بتاعه
 في ناس بيحبوا بعض وبتستنا حبيبها بس عشان بتحبه بس
 مش عشان عندها طموح زيه
 او عايزة تكافح
 ودول بقوا كتيييير
 وعلى فكره احساس الراجل ان حبيبته واقفة جمبه وبتكافح زيه وانها طموحه زيه
 بيخليه فرحان اكتر من كلمه بحبك على فكره

وده اللي كانت حساه بطله الفيلم .. بالرغم من ان كان عندها " جايكوب " وكان بيحبها وهي حاسه بشعور حب ناحيته .. مع ذلك اختارت " ادوارد " عشان بالرغم ان عالمه غير مثالي وملئ بالمتاعب بس حست انها تنتمي اليه

وخلص الكلام

ٍسلام

مجرد سؤال؟

نشرت في 02/10/2010

في حاجات سااعات بتكون صعبه .. بتقتلك .. بس بتقدر تعيش

حياة الانسان وعيشته بتفاصيلها ومشاكلها كلها حاجات سهله بس مركبه .. سهلة الصنع .. صعبه ايجاد طريق نهايتها

كلنا بنقعد نقول ليه احنا بيحصل فينا كده واشمعنا انا - لما تواجهنا اي مشكله صعبه - ونشكي ونندب حظنا اللي خلانا نيجي الدنيا 

انا كمان كده .. يمكن انا اكتر الناس على وجهه الكره الارضيه والمجرات والكواكب والنجوم الخ الخ بتقول كده

بس قررت اتغير .. احاول افكر بطريقه ايجابيه

مش بسبب نصايح حد ليا

مع العلم - واسمحولي اخرج عن الموضوع ومع احترامي لاي حد نصحني وان انا مش بقلل من نصيحه حد ليا - بس ليه كل الناس بتنصح نفس النصيحه بنفس الطريقة والاسلوب

طب ياترى فعلا كل اللي بينصحوا دول بينفذوا كلامهم ده 100% وبصراحة؟

اكيد لا .. مش كلهم .. ومش 100% التنفيذ بيكون كامل

الكلام سهل اوووووووووووي .. سهل جدا

بس الفعل؟ .. حط نفسك مكان اللي بتنصحه وشوف هتقدر تعمل كل الحاجات دي

وبيكون الانسان ده محبط ويائس .. اكيد يعني مش يكون بيرفض النصيحة دي لما يقولك صعب اعمل كده و هحاول عشان هو مستمتع اوي بالاحباط اللي هو فيه وبالفشل واليأس اللي جواه

اكيد لأ

نرجع للسبب اللي خلاني اقرر اتغير وافكر احسن

حديث سمعته من يومين للرسول عليه الصلاة والسلام

( قَالَ : (إِنَّ عِظَمَ الجَزَاءِ مَعَ عِظَمِ البَلاَءِ ، وَإِنَّ اللَّهَ إِذَا أَحَبَّ قَوْمًا ابْتَلاَهُمْ ، فَمَنْ رَضِيَ فَلَهُ الرِّضَا ، وَمَنْ سَخِطَ فَلَهُ السَّخَطُ ) .صدق رسول الله صلى الله عليه وسلم

يعني ربنا بيحب الانسان لما بيبتليه .. بيختبر ايمانه وقوة تحمله .. وكل ده له جزاء وثواب عند ربنا للانسان ده

انا قررت اصبر و اقول في كل حاجة وحشه تحصلي مهما كانت كبيره او صغيره

انا لله وان اليه راجعون  

مش هنصح حد واقوله اعمل زي

بس هسأل سؤال واحد  

لما يكون ربنا بيحبك وبيختبر حبك له وانت فعلا ايمانك قوي ولا لأ .. لا وايه كل ده له ثواب وهو انك تدخل الجنه

هتبقا تودو كيكه لا بتحل ولا بتربط .. ولا هتصبر؟

خلص الكلام

سلام

الوحدة

نشرت في 11/09/2010

ايه اللي كان ممكن يحصل لو كان الانتحار مش حرام .. كان كام واحد ممكن يخلص من حياته لاي سبب من الاسباب

ايه الفرق بين الموت والوحدة .. ساعات بحس ان الاتنين واحد او جزء لا يتجزأ من التاني ..

الموت بتكون فيه لوحدك ..  و الوحدة بتكون فيها بتموت

ليس كل ما يتمناه المرء يدركه! .. الدنيا دي غريبه اوي

مجنونة

زي الحب .. الحب كمان مجنون وجزء من الحياه .. مش شرط حب الحبيب لحبيبه .. حب نفسك

حب اهلك .. حب اصحابك .. واكيد حب ربنا .. وحب الوطن كمان

ما هو لما تحب كل دول .. وهما كمان يحبوك .. عمرك ما تحس بالوحدة

بس انا في نظري الحب هو شعور بالامان .. ممكن تكون مش عايز تحب بس بتحب .. لمجرد الحب

بتكون مش مهتم باللي هو المفروض حبيبك بس عايزة جمبك .. تسمع الكلام اللي بيقولوا ليك .. يطمنك

يحسسك انه بيخاف عليك .. وجودك عنده مهم جدا

يحبك اكتر من نفسه

ده اللي احنا عاوزينه .. بس اكيد لو لاقينا حد فيه كل ده .. هنحبه

احنا مجرد ما نلاقي حد فيه حاجة واحدة من دول بنحبه

نرجع لشعور الوحدة ..

هو ممكن يكون حد جرب ينتحر بس خايف يعمل كده تاني؟ .. احساسه زي ما تكون ان دي هي اول مرة مش التانيه

و ده راجع لان ربما الاولى كانت في لحظة عدم ادراك او وعي .. لمجرد صدمة اخدها في حياته

اكيد كلنا اخدنا صدمات كتيره .. بس اسوأ صدمة لما تنخدع ناس بتحبهم

ناس من دمك .. او صحابك .. حبيبك

والاسوأ لو كل دول اكيد

الموت اسهل مما اي حد يتخيل .. سهل جدا تنهي حياتك

الاصعب انك وانت عايش تحس انه منتهية لوحدها وانك عاوز ترجعها

الاصعب لو اتكلمت واللي منك مش بيسمعك .. ويسمعك حد تاني غريب عنك

بس يبقا كويس ان في حد سمعك .. في ناس محدش بيسمعهم اصلا

في ناس عشان تتخلص من الوحدة بتحبس نفسها جوا احلامها

زي فيلم اسف ع الازعاج كده .. تتخيل ناس .. تكلمهم تعيش حياتك وكأنهم فيها

تكون قربت تجنن

ممكن تكون الوحدة هي السبب في ان الانسان يكون عاوز يحب؟

ولا عدم الاحساس بالامان؟

ولا انه محتاج للحنان؟

ولا كل دول مع بعض؟؟؟؟؟

الوحدة هي حلم غريق ع الارض

احساس بيقتل بجد

بس لازم مهما حصل .. يكون عندنا ثقة وايمان بالله

لاننا مالناش غير ربنا


خلص الكلام

سلام

بين زمان ودلوقتي

نشرت في 25/08/2010

مرة امي حكيلتي ان ايام السادات كان في وزير تم إقالته عشان رفع سعر حاجة

دلوقتي .. كلنا بنشتكي من - عدوا معايا يا ولاد يا شاطرين - (( مياه ملوثه - قله الغذاء 

واستيراد قمح وخلافه من الخارج وعدم وجود اي ريحه اكتفاء ذاتي - ازمة رغيف 

العيش - ازمة بنزين ومن شاطرتنا كنا بنصدر البنزين لاسرائيل بثمن رخيص واهو 

دلوقتي في ازمة الكهربا رجعوه لينا ب 7 اضعاف التمن - واللي محدش اخد باله من 

في الجمله دي وكله بيركز في حكايه اسرائيل ده بيقولك 7 اضعاف التمن هي البلد دي

فيها فلوس ولا ايه .. ولا حد تطوع وتبرع ولا لموا من بعض المسئولين واهو احنا في 

رمضان يعني وكلوا بثوابه -  و الخ الخ الخ من المشكلات حتى اخر مشاكلنا حاليا وهي الكهربا ))

مالكوا يا اخواننا دول بيعملوا لينا جو رومانسي شاعري على ضوء الشموع - هي الدنيا

اتهدت ولا ايه اللي جرا - فيها ايه لما الوزير يطلع ويقول اننا السبب عشان قاعدين في 

التكييف و بنغسل بالغسالات الاوتوماتيك - هي النضافة يا وليه منك ليها حبكت دلوقتي - 

سيدي الوزير المبجل

رساله من مجردة فتاه صغيره و الرزق على الله .. انت بتكلم عن ناس عايشين طول حياتهم اودام التي في والتكييف و الميكرويف و الخ الخ

ده البلد دلوقتي نصها غلابه .. واتحداك نسبه الغلابه فيها اكتر كمان

لازم تعرف انت بتكلم عن اي اساس .. وحتى لو كل الناس كده انت جاي تحاسبهم وتقولهم مفيش كهربا هو عقاب يعني

سيدي الوزير لو انت مش قادر تشيل هم منصبك يبقا تتركه احسن لينا كلنا

كفايه قطع كهربا .. البلد مش شايفها بعضها

الرحمة حلوة ده احنا في شهر مفترج

خلص الكلام

سلام وربنا يستر

رساله الى د/ البرادعي

نشرت في 24/08/2010

رساله الى الدكتور البرادعي

حقيقي انا معجبه باللي انت بتعمله - ودي وجهات نظر يا حكومتنا و بيكفله حقي الدستوري ودستور يا اسيادنا - وعاجبني موضوع التوقيعات وموضوع ((زي مانقول كده بلغه الانترنت)) - update - لقانون الطوارئ

الحكايه دي حلوة و زي الفل وبلغه الاعلامي عمرو اديب - فله شمعه منورة - بس كل ده حلو للشباب المناضل الجاي عشان منتبهدلش - واكيد كلنا عارفين اننا عايشين عيشه ايييييييييه فل و لوز على رأي حد اعرفه -  بس ده حلو وتمام بس و الناس الغلابه .. سكان المقابر و العشش و اللي تحت خط الفقر اللي ممكن يعدي عليهم ايام مياكلوش ولا لقمة واحدة .. ده حلو عشانهم في ايه .. الناس دي عاوزة رعايه و غذاء و تعليم وحاجات كتييييييييييييييييييييييييييييييييييييييييير

الى الدكتور البرادعي انا من موافقي التغيير جدا لان برضو التجديد مطلوب .. والتجديد اللي هو تجديد في كل حااااااااجة - مش حسن ابو حسين سافر يبقا حسين يمسك بداله الدفاتر - 

بس وياريت برنامج انتخابي اعمل زي بتوع امريكا يقعدوا قبل الهنا بسنه يشرحوا برنامجهم الانتخابي و ده حلو على فكر لانه الخصم لما يحطلك في طريقك الطوب والبرك انت تردمها لحد ما يجي ميعاد الانتخابات يبقا تكون ردمت كل الحفر والبلاعات و الليله تكون متظبطه

وكويس لانك هتقدر في المدة دي تحدد حجم المصيبه اللي انت هتشيلها - لان الناس مشكلتهم مش حاسه ان نص البلد اتباعت يعني شوية و هنطرد منها ده احنا بنستورد الغاز الطبيعي من اسرائيل وذلينا نفسنا يعني اسرائيل منورة بغاز مصر ومصر منورة بأهلها - وبجد ربنا يكون في عونك لو حضرتك مسكت او اي حد تاني - جديد يظهر -

وياريت تموت الشك الموجود في بعض النفوس انك قلت هتعمل الحكايه دي بتاعت قانون الطوارئ عشان خاطر تكسب صوت شباب 6 ابريل - اللي هما دلوقتي قربوا يبقوا قوة عظمى - و دي حاجة بقولها و اجري على الله

ويمكن لغة حواري ليست لغه عربيه و ليست منمقه او ليست بها الدباجه المعتادة .. ولكني بحب اعبر عن طريقتي وبطريقة جيلي

خلص الكلام

سلام