انا عارفه نفسي

هو ده يعني كان ذنبي ولا انا اللي اختارت كده .. دي ارادة ربنا .. ربنا هو اللي عايز كده وهو اللي خلقني كده

خلقني مش حلوة 

في ناس بتشوفني حلوة وفي ناس كتيــــــــــــــــــــــــــــــــــــــــــــر بتشوفني مش حلوة خااااااااالص ليه بقا؟؟ .. عشان انا سمرة .. ربنا خلقني كده مش حلوة اعمل ايه

بس مش معنى كده ان حد يجرحني او حد يسيبني عشان شكلي او ان حد يحكم عليا من شكلي

على فكره انا كنت هنتحر للمرة الرابعه بسبب حد جرحني باني وحشه .. بس رجعت في كلامي

لانه انسان غبي انا مش هعترض على حكم ربنا عشان حد .. وانا انسانه ليا شخصيه وليا كيان واحساس وقلب

ومش غرور بس انا عندي قلب وطيبة مش عند حد .. والا مكنش جرا اللي جرالي في حياتي

ليه بنبني حياتنا على اراء ناس و مين اللي قال الناس تعرف عني اكتر مني والناس تقدر تحكم عليا صح وهما اللي يقدروا يقولوا انا طيب ولا شرير و لا ايه

الناس دي مش صادقه 100% .. الناس دي زيهم زيك بالظبط مفيش فرق

حلوة اوي الحماسه اللي انا فيها والتفاؤل بس على فكره .. ممكن الفصل الجاي تلاقوا شحنه تشاؤم صعب حد يتحكم فيها

عادي مريضة نفسيا بقا :D

المهم حاول تعرف انك عاوز ايه

عارفين .. انا لحد دلوقتي مش عارفه بجد انا عايزة ادخل كلية ايه .. بس نفسي ادخل كليه لحاجة انا بحبها

بس انا بحب الكتابه

بس نادرا لما الاقي حد يشجعني عليها كنت في الاول بكتب خواطر وشعر كان بيعجب الناس وتطور الموضوع لكتب اهو بس الكتاب ده والكلام ده مش هيحسه غير ناس معينه

الناس اللي تايهين في الدنيا زي حالاتي .. حساسين .. اقل كلمه وحشه تجرحهم .. واقل كلمه حلوة تفرحهم

جربت ابقا ايمو .. بس فشلت مرتاحتش معاهم بصراحة مع انهم كاشخاص حبيتهم بس اقصد ايمو مصر

بس بقيت بلاك ويدوو في فترة من حياتي ناس كده زي الايمو .. بس رجعت عن الفكره دي

ساعات بحس اني مش عارفه انا مين؟!!!! .. انا اتجننت يا ناس .. طب وايه يعني

ما انا كده كده مجنونة

عمرك شوفت حد رحب بفكره انه مريض نفسي اوي مش عارفه ليه .. بس عجباني الحكايه دي .. او مصدقاها

نفسي حد يعالجني فعلا

الموضوع بيتطور يا جماعه يوم عن يوم .. بس بحس ان الحاله دي مش انا اللي لوحدي فيها

انا بحب انام عشان حاجتين ابكي او احلم .. حلم يقظه ..  بنيت مدينه في حلمي ده .. و عاش فيها ناس .. طيبين وفي اشرار بس دايما بنتصر عليهم

طبعا عكس الواقع نوعا ما .. بس برضو الحق بينتصر بس مش دايما

وشوفت هناك فارس احلامي .. رجل مثالي في وجهة نظري .. بيحبني بجنوووون وانا كمان بحبه

كفايه جنان عشان مش تخافوا مني :D

خلاصة الكلام ان مش عيب تكون مجنون او وحش او عندك عيب خلقي او حتى انسان ذكاءك محدود او اي حاجة

العيب انك تكون انسان مش كويس

العيب ان الناس تحكم عليك وتكرهك عشان الحاجات دي

.. اصرخ في وش الناس دي وقولهم

انا كده انا سبرايت  :D

شوية ألش يا جماعه عادي يفكوا الكآبه دي

لا بجد ابتسم في وشهم دايما وارفع راسك لفوق وقولهم  .. يمكن انا زي ما بتقولوا عليا مجنون او وحش او كذا

بس الاهم انا عندي قلب وضمير واحساس لو حد فيكوا مكاني هيكون شعوره ايه لما يحصل فيه زي ما بتعملوا فيا

و سامحهم .. ده ربنا غفور رحيم

ازاي احنا منسامحش :)

ربنا يسامحهم

شخبطة احاسيس

عمرك حسيت انك مجروح مع ان محدش جرحك ؟؟؟ .. عمرك حسيت انك نفسك تبكي او صعبان عليك نفسك؟؟ 

تقعد مع نفسك تفكر .. في ناس بتحب موسيقى تصويريه مع اغاني حزينه .. ممكن نبكي شوية و نروح ننام ونحلم احلام مالهاش معنى .. او احلام ليها معنى مش مهم .. المهم اننا نحلم .. بس احيانا بنعيش جوا احلامنا ومش بنعرف نطلع منها 

امسك ورقة وقلم وطلع كل احساسك فيها حتى لو شخبطه طلع كل اللي جواك .. يمكن ترتاح

بس ليه بنحس ان مشاكلنا بتروح لما نلاقي حد نحبه يبقا معانا .. هل ده معناه عدم ثقة بالنفس واننا محتاجين غيرنا دايما؟؟

ولا يمكن المراهقين بس اللي بيحسوا الاحساس ده .. او يمكن المرضى النفسيين زي حالاتي هما اللي كده بس

انا بحس اني مريضة نفسيا او مش بحس .. انا واثقة من كده

بس مش حاجة حلوة ان مريضة نفسيا تكتب كتاب .. كتاب محدش هيقراه او مين يعرف يمكن حد يقراه ويستفيد منه

انا بسمي اللي بعمله ده شخبطة انسانيه .. تعبير لا شعوري عن اللي بيحصل في حياتي

بس ساعات بحس اني الوحيدة من نوعي اللي بيحصل كل المشاكل والحاجات الغبيه دي وبحس احيانا اني الوحيدة اللي جالها كل مشاكل الناس في حياتها مرة واحدة

الحياة دي وحشة اوي محدش يفتكر انها حلوة محدش يتغر بالحاجات اللي فيها لانها كلها دهب من برا ومن جواها صفيح

بس حرام برضو فيها حاجات حلوة والحاجات الحلوة دي هي اللي بتخلينا نعرف نعيش .. هي حتت الالماس اللي بنلاقيها بالصدفة جوا الصفيح

اول فصل اكتبه وانا ببكي - حبه استعطاف وشجن بقا وكده - .. انا عارفه ان ناس كتير هيتهموني اني كئيبة

بس دي مش انا خالص انا مش كئيبة خاالص .. لست هذا الشخص ابدااااا 

اي حد بيعاني من اي مشكلة معذباه مهما كانت صغيره .. احب اقوله متيأسش زي حضرتي خااااااااالص .. هتتعب اوي

ولو يأست مرة او اتنين ده مش معناه ضعف منك .. و اوعا تسمح لحد يتهمك بالضعف وخليك دايما راسك مرفوعه لفوق مش غرور بس ثقة في نفسك وفي ربنا انه واقف جمبك وانك مش ضعيف واد كل حاجة

متستغربش من اي حاجة في الدنيا ممكن تقابلك .. انا شوفت ناس من كل الاشكال والالوان عشان كده بقت اي حاجة مش بتفاجئني .. ولما اقرب الناس ليك من دمك يغدر بيك .. صعب تتفاجئ من غدر اي حد تاني

يبقا هبل لو اتفاجئت

اغرب احساس انك تحس ان في حد جرحك وانت مش عارف هو مين يمكن من كترهم او يمكن لانك مش عارف وحاسس انك مجروح وخلاص

والاغرب انك تفتقد احساس معين او شخص انت متعرفهوش يمكن شوفته او يمكن مستنيه وحاسس ان علاجك معاه

يمكن معرفش انا مريضة بايه .. اكتئاب او شيزوفرنيا او اي بطيخ ميهمنيش

بس مرضي اللي معرفوش ده  بقيت احس انه ادمان مش قادرة اتخلص منه واتعودت عليه

الموضوع بقا غير عقلاني بالمرة

ربنا يستر

انزل احمي اخوك المصري

عايزين تفضلو كده لحد امتى؟؟ .. انا تعبت زهقت منكم وفي الكلام في الموضوع ده
كل مرة نقول اننا اخوات ومصريين ومفيش فرق ما بينا وان الدين لله و الوطن للجميع
في مسيحيين نازلين شتيمه في المسلمين ،، و في مسلمين نازلين شتيمه في المسحيين
الاسلام بيحرم قتل الناس بدون وجه حق على فكره ومش من حق اي حد مهما كان مين انه يأذي المسحيين
ومحدش حاسس باللي بيحصل في العريش اللي هتتحول لاماره اسلاميه وهيتفرض احكام على مسلمين زيهم اصلا
والجيش مطنش كل اللي بيحصلم عرفش ليه
بس عامه خلينا في موضوعنا الاهم واننا اخوات وهنفضل غصب عن اي حد مسيحي بيقول ان المسلمين مش اخواتنا او اي حد مسلم بيقول ان المسحيين مش اخواتنا
عشان احنا بس اللي هنقدر نحمي البلد دي لا عساكر و لا ظباط ولا حتى مجلس شعب هيقدر يعمل اللي احان نقدر نعمله لما نحمي البلد دي
 بس انا عايزه اعرف هو مين اللي بيعمل كل ده
كل ده عشان عملنا ثورة؟؟
كل ده عشان قولنا لأ؟؟؟
بتنتقموا مننا عشان بنحب البلد دي ؟!!!
يمكن تكونوا قتلتوا مينا او يمكن تكونوا قتلوا محمد و السيد بلال و خالد سعيد وكل الشهداء اللي بيموتوا عشان خاطر البلد دي
بس مستحيييييييييل هتقتلوا حلمهم
و زي ما المسحيين حموا المسلمين وهما بيصلوا ايام الثورة بحياتهم
هنحميهم من اي حد بيحاول يعمل بينا وبينهم فتنه او يأذيهم
انزل واحمي اخوك المصري
لانك مصري انت كمان

كلامي بيموت

حاسه ان خلاص كلامي بيموت
حاسه ان حياتي فيها شئ مش مظبوط
حاسه اني بغرق في دوامه
حاسه اني بتوه من نفسي كل ساعه
حاسه اني مش عارفاني ولا حساني
حاسه اني بقيت حد تاني
حد احتمال يكون ممل
حد معندوش ذره امل
حد نسا كل اللي فات
حد ضاعت منه الذكريات
حد حب يكون ومكانش
حد حب يعيش وماعش
حد نسي هو مين
حد نسي راح فين
حد زهق من حياته
حد نفسه يشوف مماته
حد خلاص كره نفسه
ومن كتر كرهه حب يقتل ذاته
مبقتش لاقيه نفسي
مبقتش عارفه انا عايزه ايه
مبقتش لاقيه عقلي
ضاع مني مش عارفه ليه
يمكن اكون اجننت
يكون كلامي مظبوط
بس اللي متأكده منه
ان كلامي بيموت

الشعب المسجون

انتخابات رئاسة الجممهورية .. المرشح للرئاسة .. الرئيس القادم لمصركل ما اسمع ده ببقا هموت على نفسي من الضحك عشان معظم الناس بتنسا السؤال المهم من الكلام ده كله
هو مين ينفع رئيس لمصر؟؟؟
انا عن نفسي شايفة ان ولا واحد من المترشحين دول ينفع يبقا رئيس
وليه بقا .. تعالوا نبدأ من الاول خاااااااااالص
محدش يفتي ويقول البلد دي محتاجة لكرباج احنا شعب عايز ياخد بالجزمة
عشان اللي بيقول الكلام ده بيبقا متخلف
ازاي عايز الشعب اللي انت منه ياخد بالجزمة
طب ما انت هتاخد بالجزمة معاه ولا انت هتاخد بجزمة تانيه مثلا؟؟
وبعدين لا اي دين من الاديان قال ان الشعب ياخد بالجزمة من الحاكم
ولو احنا زي ما بيتقال شعب همجي
يبقا العيب مش في الشعب .. العيب في اللي خلاهم كده
ولكل انسان بيقول الريس حلو الريس جميل الريس ده زيه مفيش
افتكر قبل حكم الريس ده وقسم كل فترة من حكمه دي على 10 سنين
وشوف في ال3 فترات دول مدى تطور الهمجيه عند الشعب وقارنها بالحكام اللي قبله و مدى همجيه الشعب في عصرهم
وبعدين الفقر بيعمل اكتر من كده
البلطجية بقوا يعيشوا بالبلطجة زي الحراميه الكبار اللي دمروا البلد
كانوا بيعيشوا بسرقه البلدلازم حال البلد ينصلح الاول عشان نقدر نقضي على ظاهره البلطجي
وده هيحصل لما نقضي على البطاله و الشرطة ترجع محترمة كده وعاقله وتمارس الواجب الوطني بتاعها بجد و كل شخص سياسي او عضو في مجلس الشعب او اي شخص من افراد الشعب يبطل يستعين بالبلطجية ويلجأ للقانون
وعشان كده لازم يبقا في استقلال القضاء و ان العدل فعلا ياخد مجراه وان العداله فوق اي شخص و اي شئ
و عشان نقضي على اي مشروع بلطجي جاي من طفل صغير
اننا نطور التعليم ،، التعليم اللي بقا حاله اسوأ من حال الناس اللي متبهدلين في الصومال
احنا عندنا اسوأ تعليم في العالم ،، مفيش نظام و مفيش مناهج محترمة و مفيش الا الدروس الخصوصية واللي مش بياخد درس هيسقط
مفيش تشغيل دماغ مفيش حرية تعبير هادف ومحترم في المدارس
الطلاب بيروحوا المدرسه عشان يلعبوا و يهزروا بس مش بيروحوا عشان يتعلموا لانهم بيتعلموا في الدروس و في اي سنتر بياخدوا فيه الدرس
انا عن نفسي كنت بعمل كده ومش انا لوحدي دي مشكلة جيل بحاااله ومأساه بتكرر كل يوم في اي مدرسه
مش لازم الطالب يدخل الكلية بمجموعه اد ما لازم يدخل الكلية بمهاراته الخاصة ومواهبه وعقله
وبعدين يعني البلطجية دول اتعلموا واتثقفوا واشتغلوا
لازم كمان الصحة ونهتم بالمستشفيات و نطورها لكل فرد في الامة
ايه رأيكوا في كل الرغي ده؟؟
كلام جميل و اي عيل في ابتدائي ممكن يرص الرصة اللي انا قولتها دي
و ده اللي بيحصل كل واحد مرشح نفسه بيقعد يقول الكلام ده
انا هقضي على البطاله انا هطالب باعدام مبارك وانا هعمل وهعمل وهعمل
كل ده جمييييييييييييييل
بس الاهم لما تيجي تقول انا هقضي على البطاله تقولنا هتقضي عليها ازاي وايه هي خططك ومشروعاتك؟؟
لما تقول انا هطور التعليم تقولنا ازاي هطور التعليم و التعليم في مصر هيكون شكله ايه؟؟
لما تقول انا ههتم بصحة كل فرد تقولنا ازاي وهتعمل ايه؟؟
وكل الكلام ده في اي مجال تاني لمصر
سواء اقتصاد او صناعه او سياحه او زراعه الخ الخ الخ
لازم نشوف حاجات ملموسة لازم نحس ان المرشح هيعمل كده فعلا
بس كلهم بيقولوا كلام واحنا شعب مش بياخد الا كلام
اخد كلام لما ضحكوا عليه وقالوا البلد فيها ديموقراطيه ولما حصلت الثورة
قتلوا في ناس ابرياء ملهمش ذنب
ضحكوا علينا بالكلام لما قالوا هنطور التعليم والتعليم فضل يتدهور ويتبهدل واخرها جابوا زكي بدر الشخص اللي ابوه كان بيعذب المعتقلين في السجون وهو عذب الطلبة
ضحكوا علينا في مشروع توشكى .. ضحكوا علينا لما قالوا هنقضي على البطاله
ضحكوا علينا كتيييييير اوووي ولسه بيضحكوا علينا لما بيقولوا ان العدل بياخد مجراه وان الاشرار بيتحاكموا
بس واضح انهم لما كانوا حاطين الكاميرات في قفص الاتهام
وكان القفص اودام الشعب في التلفزيون ،،كان الشعب هو اللي جواه مش السجين
ويارب ما يتحكم علينا بالسجن مدى الحياة
بجد ياريت

استسلام ام حرية؟

بجد مش قادرة اعبر عن فرحتي باللي بيحصل في البلد .. بجد احنا اثبتنا ان الثورة مستمره
اه صحيح هو يعني ايه ثورة؟؟
يعني اننا نثور على الفساد ,, طب ما لسه في فساد
يعني تقدر تحدد مصيرك وتغير من نفسك
يعني اننا نقضي على الفاسدين بتوع الحزب الوطني ،، اعضاء الحزب الوطني عملوا اكتر من حزب مش وطني
يعني ان العدل ياخد مجراه واللي كان اصلا لازم الناس دول يتاحكموا محاكمة ثورية ,, لكن احنا بنحاكمهم واحدة واحدة وبرااااااحة وكمان هياخدوا براءة
واضح ان ان مبارك واعوانه هما اللي عملوا علينا ثورة
بغض النظر بقا عن بتوع احنا اسفين يا عم الحاج
اللي بيحبوا الريس وبيموتوا في دباديبه عشان هو بابا وهو ماما وهو انور وجدي وحسين رياض
اللي شايفين ان محاكمته غلط وان لو عمر سليمان اترشح هينتخبوه
ولو البلوفر - عفوا - الاستاذ احمد شفيق اترشح هينتخبوه
اي حد تبع حبيب القلب والراجل الكبير هينتخبوه
لانهم لازم ينتخبوا الراجل التاني وراه
مع اني مش خايفه الا من دول والاخوان ،، والاخوان اللي اتلعب بيهم الكورة للمرة التانيه واستخدمهم الجيش وبعد كده حرق الكارت بتاعهم في الملعب
بس عامة مش هكلم عن الانتخابات دلوقتي لانه حدوتة تاانيه
انا عامة بكلم عن محاكمة الرئيس
لآنها مهزلة بكل المقاييس!!!
كل واحد يروح يقول لا العادلي حلو و زي الفل و الريس سيد الكل
لا ده عمل حاجة ولا ده عمل حاجة
ووان المظاهره دي كانت فوتوشوب - على رأي عمرو مصطفى - او يمكن هما كانوا بيلعبوا النينجا الحزينة
عشان كده كانت الناس دي بتموت كده وكده و محدش مات يعني
الناس عايشة اهي زي الفل .. وبيلعنوا اليوووم اللي الريس مشي فيه
وانه هو اللي كان حامينا واللي كان مدلعنا
وانه في عصره مكانش في فساد ولا كان في ازمة اسعار ولا بطاله و كان في امان عشان مكنش في سرقة ولا حوادث قتل ولا اغتصاب و المواطن عمره ما اتهان ولا اتظلم من الشرطة واللي كانت بتعمله في اي حد غلبان
ولا كان في مقبره جماعيه جمب امن الدولة وكانوا بيقتلوا الناس
وكانت كل الدول بتحترمنا
مش ده المفروض نقوله ونسلم بيه
بس انا مش هسلم بيه ولا هستسلم للمعتقد ده اللي بيحاوله يرسخوه في عقول الناس حاليا
لاني عارفه ان في فساد وهيفضل في فسادازاي مبارك و العادي معملوش حاجة ،، و ازاي المشير طنطاوي ممكن يكون فعلا شهد بكده
اومال فعلا هو الجيش حمانا من ايه؟؟
> الجيش < ده هو لغزي الاثير اللي مش عارفه الاقيله حل
بس بجد نفسي الناس تعقل و تفكر .. وكل واحد يغير من نفسه
الجملة دي بقولها مليون شخص
لآزم نغير من نفسنا .. لازم نغير من نفسنا
بس احنا المفروض نغير نفسنا للاحسن
لازم مع بعض نقضي على البلطجية و نعمل حملات توعيه للناس اللي في العشوائيات والمناطق الفقيره
لازم نفهمهم اللي بيحصل
عشان هما دول الاغلبيه هما دول اللي ليهم حقوق اكتر مننا ولازم يعرفوا ايه الصح وايه الغلط
وانا هحاول بنفسي لو لاقيت حد مش فاهم اني هفهمه
عشان ده اللي كان مفروض يحصل ايام انتخابات نعم او لا
وقالوا نعم عشان الاستقرار
والبلد غرقت اكتر
مش عايزين ده يحصل مرة تانيه لازم نوعي الناس ونفهمهم
وكل واحد يقرر مصيره
الاستسلام او الحريه
وانا عن نفسي اختارت الحرية
وعشان كلنا نقدر نختار الحرية والامن والامان للبلد
مش لازم يكون الشعب والشرطة و الجيش ايد واحدة
اد ما لازم يكون الشعب الاول ايد واحدة

عزائي لكــــــــــبريائــــي

عزائي لكبريائي ،، كبرياء اصبح بيخاف من حبه ليك


 حبي يعتبر غامض وصعب زي طفل اتعلق بيك


 انت ليا زي جرح مش بيخلص وصعب اني اداويك


 حب عشوائي زي مسافر فجأة تاه وسط الطريق 


 او ممكن زي سباح شاطر مات في لحظة غريق


حبك ليا اصعب من جرحك ،، من نسيانك او هجرك


حبك ضعف بس ضعفي اودامك هو نقطة ضعفك


حبك صعب حاله من الجنون ممكن اي انسان يوصلها


حبك معاه سهل اكون الانسانه اللي كان نفسي ارجعلها


حبك بالنسبه ليا مغامره صعبه خوفت منها في يوم لكني،


 اصبحِِت كلمه بحبَك زي حلم انتحار شخص حب انه يموت شهيد


 وان كان الحب بايدي لكنت قطعت وريدي وصفيت حبك من دمي 


 مع انه صعب عليا اشوفك في مرايتي بعينيا ومع غضبي حبي ليك يزيد