الثورة مستمره

 طبعا كلنا شايفين اللي بيحصل الايام دي وباين اوي من العنوان اني هدافع عن اللي

في التحرير .. ولو انت ضدهم يبقا يا اما تسمع وجهة نظري يا اما متقراش المقاله دي 

خلونا الاول نعرف ليه يعني ايه رحيل المجلس العسكري

المجلس العسكري لما يرحل مش معناها انه يسيب البلد و يمشي ،، المجلس العسكري 

لما يرحل معناها انه يسيب الحكم ويرجع لدوره الاساسي وهو حمايه مصر

واحنا مش عايزين حاجة غير ان المجلس العسكري ينفذ وعده وهو اننا ننتخب

رئيس الجمهورية بعد انتخابات مجلس الشعب

مش عايزين حكومة شرف الانتقاليه اللي مالهاش اي تلاتين لازمة ولا عملت اي حاجة

في الفتره الانتقاليه الغير مفهوم فيها اي شئ من اساسه

وبعد ما استقالت حكومة شرف اخيرا ،، وبعد خطاب المشير طنطاوي المستفز

كعادة الخطابات اللي بتطلع في الثورة

خطابات ليس لها وضوح او رؤى 

واللي بتنفي قتل المتظاهرين على ايديهم ،، ازاي بيحاولوا يخدعوا الناس

اذا كان الاعلام الكداب بيحاول يضلل الشعب للاسف في وسيلة هما مش قادرين

يتحكموا فيها ،، وهي الانترنت

ميزة الانترنت انها بتخليك تشوف الحقيقة بعينيك

والاسف الحقيقة بتبقا زي الزفت

حسيت اننا في فلسطين ،، مش معقولة ان المصري بيموت على ايد مصري

بس واضح ان المصري اللي بيموته ده مش مصري

لو كان مصري بجد كان هيرفض انه يقتل اخوه

ولا يفرح ويهلل لرئيسه في الشرطة لما يقتل واحد

الشرطة زي ما تكون بتتلذذ في قتل المتظاهرين !!!

عشان كده احنا مش هنصدق الكلام اللي اتقالنا قبل كده 

السلطة بالشكل ده الافضل لها انها تتسلم لحكومة انقاذ وطني 

وان الجيش يلتزم بواجبه الاساسي بانه يحمي البلد وبس 

 بتكوين حكومة انقاذ وطني متفق عليه من جميع الفصائل الان هي 

بطبيعتها حكومة توافقين بين القوى السياسيه و بالتالي سيكون التوافق عليها شئ حتميزائد ان تأجيل انتخابات مجلس الشعب اسبوع ولا اسبوعين لا هيقلل ولا هيزود من شعبيه مرشح من المرشحين
بالعكس انا شايفه ان مرشحين مجلس الشعب الايام دي اسوأ مرشحين مروا على مصر

 مرشحين ولا تعرف هما مين و نصهم من فلول النظام السابق

  

لان بالمنظر ده و احنا فاضلنا شهرين وتكون مرت سنه على الثورة !!!

سنة بدون ادنى تغيير .. حسني او حسين

والتلميذ طول عمره بيكون اسوأ من استاذه

كل حاجة بتكرر زي ما نكون في فيلم الف مبروك !!

خطاب المشير نسخه من خطاب حسني مبارك

الشرطة و الامن المركزي بيضرب المتظاهرين

الغاز المسيل للدموع متوفر وبغزارة

لا وحاليا في غاز جديد كمان بيوزعوه على المتظاهرين كهدية

اللي في التحرير دول مش بلطجيه ،، لان الحكومة هي اللي عملت البلطجيه اصلا

اللي في التحرير دول مش اجندات و خونه و عملاء ،، لان العميل بيدمرك من بعيد مش بيعرض نفسه للموت عشان يدمرك

اللي في التحرير دول مصريين ،، عشان كده بيموتوا لانهم بيحبوا البلد دي

صعب اوي منظر شهيد مرمي في الزباله

مفيش عميل او بلطجي بيعمل كده

لو في حد بيدمر البلد يبقا هما مش احنا

فكر و قولي ليه النظام السابق مش بيتحاكم محاكمة عادله؟؟

ليه البطئ في القرارات ؟؟

ليه كل واحد فيهم متمسك بالكرسي ومش عايز يسيبه؟؟

اراهن ان الحكايه مش حكايه سرقة فلوس البلد وبس

اكيد في مصايب تانيه عاملينها في البلد وخايفين ان الناس تعرفها

واضح ان البلد اتباعت

بس لو هما قرروا يبيعوا البلد احنا مش هنسمحلهم

ساعات الامل بيطلع من ملل

و مصر طول عمرها عايشة في ملل ،، حتى الملل في تكرار التصرفات الغبيه مرة تانيه

واضح ان مفيش حد سامع المصريين في التحرير

بس ربنا اكيد سامعهم .. وربنا معاهم ومش هيضيع حق المصري الحر

لو انت مش معاهم مترجعش تندم لما تعرف انهم على حق

عشان ساعتها هتكون جبان و من بتوع احنا اسفين يا ريس ،، احنا اسفين يا مشير

ولو برضو الوضع متغيرش وفضلنا زي ما احنا 

يبقا احنا اسفين يا صلاااااح ،، عشان واضح ان مفيش اصلاح